Tv Shqip

Montgomery: SHBA vështirë të lejojë ndarjen e Kosovës

bannqe — Sun, 18 Jul 2010 13:46:33 GMT

Beograd, 18 korrik – Ndarja e Kosovës ka qenë dhe ende është zgjidhja më e mirë e problemit mjaft të ndërlikuar kosovar. Shtetarët serbë me iniciativën për një rezolutë për ndarje në OKB dhe hapjen e kësaj çështjeje, kanë treguar dëshirën që sërish të nisin bisedimet për statusin, por është shumë vonë, ka thënë në një bisedë për gazetën serbe "Blic”, William Montgomery, ish-ambasador i SHBA-së në Beograd.

Sipas tij, ndarja do të ishte e mundshme vetëm në rast se SHBA do të çonin mesazh të fuqishëm udhëheqësve të shqiptarëve të Kosovës që ta shqyrtojnë këtë çështje. Kur të kihet parasysh qëndrimi aktual i Washingtonit, mundësitë që diçka e tillë të ndodhë janë ekstremisht të zbehta, thotë Montgomery.

"Jam pesimist për çështjen e zgjidhjes së problemit të Kosovës. Kjo që SHBA-të nuk do të bëjnë në bindjen e shqiptarëve të Kosovës që të pranojnë kërkesat e serbëve do të thotë se Serbia duhet të pranojë shumë më pak se sa është aktualisht e gatshme. Qeveria aktuale serbe e ka fokusuar të tërë politikën e vet të jashtme e të brendshme në çështjen e Kosovës dhe e ka bërë rob vetveten për shumë çështje të rëndësishme. Duhet të jetë shumë vështirë që të hiqet dorë nga këto qëndrime të forta, të cilat pushteti serb i ka marrë pa ndonjë konfrontim të fortë me oponentët politikë. Mbetet të shihet se a do të pranojë qeveria serbe zgjidhjet, të cilat imponohen”, ka thënë Montgomery.

Sipas Montgomeryt, "më së shumti që Serbia mund të shpresojë aktualisht është autonomia në veri dhe në enklava”.

"Mendoj që shqiptarët e Kosovës dhe bashkësia ndërkombëtare do të shkojnë mjaft larg në dhënien e autonomisë së serbëve të Kosovës. Por, edhe kjo është një por e madhe, çmimi për këtë do të ishte fundi i institucioneve paralele dhe njohja e pushtetit të lartë të shqiptarëve të Kosovës, duke futur këtu edhe vendin e saj në OKB. Ekziston mjaft hapësirë për bisedime në kuadër të parimeve kyçe nëse Serbia është e gatshme të shkojë kësaj rruge. Ka mundësi që të arrihet shumë për serbët e Kosovës, kjo është e sigurt. Më vjen keq ta them, por mirëqenia e tyre do të duhej të ketë prioritet shumë më të madh se sa ka tani”, tha Montgomery në intervistën për gazetën serbe "Blic”.

Duke u përgjigjur në pyetjen se cili do të mund të ishte vendimi i GJND-së rreth çështjes së shpalljes së pavarësisë së Kosovës, ish-ambasadori amerikan në Beograd tha "vërtet nuk e di, madje askush nuk mund të parashikojë se cili do të jetë vendimi. Është e sigurt, megjithatë, se nëse ai vendim do të jetë në favor të palës serbe, do të forcojë përpjekjet serbe që të ndalojë njohjet e mëtejshme, si dhe dëshirën që të vazhdohet me luftën kundër pavarësisë së Kosovës. Mirëpo, në të kundërtën, nëse vendimi do të ishte në favor të palës shqiptare kjo jo vetëm që vendet e tjera që nuk e kanë njohur pavarësinë ta pranojnë, por do të nxiste partnerët kyç evropianë që të tregojnë gjithnjë e më pak simpati dhe mirëkuptim për qëndrimin serb”, tha Montgomery./koha/prishtinaWEB

Bunjaku: Meritova më shumë hapësirë në Botëror

bannqe — Sun, 18 Jul 2010 13:44:56 GMT

Prishtinë, 18 korrik - Sulmuesi kosovar Albert Bunjaku vlerëson se ka merituar më shumë hapësirë në botërorin "Afrika e Jugut 2010". 26-vjeçari luajti vetëm në 15 minutat e fundit në ndeshjen e Grupit H kundër Kilit, ku Zvicra humbi me rezultatin 1:0. Dhe, për këtë çerek ore ai shfaqi lojë të mirë dhe kjo e shtyu të besonte se në ndeshjen e radhës, atë kundër Hondurasit, do të luante nga fillimi. Por, nuk luajti fare.

"Nuk jam i kënaqur me minutazhën që kam pasur për Zvicrën. Kam merituar më shumë të luaj, pasi kisha një paraqitje të mirë ndaj Kilit. Bëra një asist të shkëlqyer për Eren Derdiyok e nëse ai do të shënonte, sigurisht se do të kualifikoheshim tutje. Gjithsesi jam i kënaqur që kisha rastin të paraqitesha në një garë siç është Kupa e Botës, pasi kjo është ëndërr e gjithë futbollistëve", ka thënë të shtunën Bunjaku për gazetën.

Sulmuesi i Nurnbergut, Albert Bunjaku, ka thënë se Zvicrës i munguan dy gola për ta kaluar Grupin H. Zvicra në ndeshjen e parë pati mposhtur Spanjën 1:0, që më pas përfundoi kampione e botës, në ndeshjen e dytë humbi nga Kili 1:0, kurse ndeshjen e fundit barazoi pa gola kundër Hundorasit që vlerësohej autsajderi i grupit. Dhe, si pasojë e këtij barazimi nuk arriti të kalonte grupin.

"Filluam mjaft mirë kampionatin, fituam kundër Spanjës, por ndodhi e kundërta ndaj Kilit, pësuam disfatë të papritur. Zvicrës i mungoi fitorja me dy gola diferencë kundër Hundorasit, për të zënë vendin e dytë, por kjo nuk ndodhi. Ishim shumë afër, por nuk arritëm ta mposhtim Hundorasin", ka thënë Bunjaku.

26-vjeçari ka vlerësuar lart mesfushorin, Xherdan Shaqirin. Ai thotë se Shaqiri ka një të ardhme të mirë dhe se sipas tij, 18-vjeçari mund të luaj për ndonjë skuadër të madhe pa ndonjë problem.
Bashkë me Bunjakun në këtë Botëror ishin edhe dy kosovarët e tjerë Xherdan Shaqiri dhe Valon Behrami. Të tre luajtën nga pak minuta.

"Xherdani ka pasur paraqitje jashtëzakonisht të mirë për 11 minuta sa luajti kundër Hundorasit. Ai meritoi edhe më shumë minuta, pasi hyrja e tij në fushë shpejtoi ritmin e Zvicrës dhe rregullisht mundohej të bënte diçka për ekipin. Xherdani pa pikë problemi mund të luaj për ndonjë ekip të madh ani pse ka vetëm 18 vjet. Ai është pjekur shumë si futbollist përkundër moshës së re që ka", ka thënë Bunjaku.

Më keq se Bunjaku e Shaqiri pësoi Behrami. Ai u aktivizua nga fillimi në ndeshjen kundër Kilit, por pas 20 minutash lojë u përjashtua me karton të kuq. Ky vendim i arbitrit ishte kritikuar nga të gjithë ekspertët si i tepruar dhe i rëndë. Njëjtë mendon edhe Bunjaku. Behrami duhej të luante edhe në ndeshjen e parë kundër Spanjës, por ishte i lënduar. Në të tretën kundër Hondurasit nuk pati të drejtë.

"Më vjen keq ajo që i ndodhi Valonit. Ai nuk e meritoi as kartonin e verdhë e lëre më të kuqin. Gjyqtari i atij takimi na dëmtoi rëndë dhe ajo mund të ishte edhe arsyeja se pse ne humbën atë ndeshje, pasi ishim me një lojtar më pak në fushë për më shumë se një orë", ka shtuar Bunjaku.
Pas një stinori të mirë me Nurnbergun në Bundesliga 1 ku shënoi 12 gola dhe pas paraqitjes në Botëror, Bunjakut i kanë ardhur shumë oferta. E fundit është ajo e nënkampionit zviceran Young Boys.

"Young Boys më ka bërë ofertë për të kaluar në radhët e tyre, por unë nuk dëshiroj të kthehem në Zvicër. Ndihem mirë në Gjermani dhe dëshiroj të qëndroj edhe për një vit këtu. Kam pasur sezon të mirë dhe dëshiroj të bëjë edhe më shumë stinorin që vjen", ka thënë Bunjaku.
Bunjaku shpreson të jetë edhe në eliminatoret në Euro 2012 me Përfaqësuesen e Zvicrës. Zvicra në eliminatoret për Euro 2012 do të ndeshet me Anglinë, Bullgarinë, Uelsin dhe Malin e Zi në Grupin G.

Bruce: Cana na befasoi

bannqe — Sun, 18 Jul 2010 13:44:03 GMT

Londër, 18 korrik - Trajneri i skuadrës angleze Sunderland, Steve Bruce, pranon se vendimi i mesfushorit kosovar Lorik Cana për t'u transferuar në Galatasaray e kishte zënë atë dhe krerët e klubit në befasi.

"Kjo gjë erdhi nga asgjëja. Por unë në punën time si trajner, kurrë nuk kam dashur të mbaj një lojtar të pakënaqur. Ai ka dashur të shkojë e të luajë në Turqi. Të jetë më afër Shqipërisë. Kështu të paktën na është arsyetuar ai", ka thënë Steve Bruce për "BreakingNews.ie".

Sejdiu dhe Krasniqi ngushëllojnë Topin dhe Topallin

bannqe — Sun, 18 Jul 2010 12:55:16 GMT

Prishtinë, 18 korrik – Me rastin e aksidentit tragjik që ndodhi në Shqipëri, presidenti Fatmir Sejdiu i dërgoi një telegram presidentit të Republikës së Shqipërisë, Bamir Topit, ndërsa kryeparlamentari Jakup Krasniqi i ka dërguar një telegram ngushëllimi kryetares së Parlamentit të Shqipërisë, Jozefina Topallit, ku u shprehën ngushëllimet më të sinqerta për shuarjen e jetës së qytetarëve që pësuan dje në aksidentin tragjik në aksin Rrëshen -Fushë Arrëz.

Në telegramin e Sejdiut thuhet : "Në emër të popullit dhe të institucioneve të Republikës së Kosovës, ju shpreh ngushëllimet më të sinqerta për shuarjen e jetës së bashkëqytetarëve Tuaj, të cilët humbën jetën në aksidentin tragjik, që ndodhi dje në aksin rrugor Rrëshën - Fushë Arrëz.
Ky lajm i kobshëm është përjetuar me pikëllim të thellë kudo në Kosovë. Prandaj, në këtë ditë zie për të gjithë ne, ritheksoj solidaritetin e plotë të popullit të Kosovës me të gjithë të prekurit nga kjo fatkeqësi e madhe, me familjarët e viktimave, me institucionet e shtetit dhe me mbarë popullin shqiptar.
Uroj që të plagosurit të shërohen sa më shpejt dhe të kthehen në shtëpitë e tyre”.

Ndësa, Krasnqi, duke e ngushëlluar Topallin shkruan: "Me hidhërim të thellë mësuam lajmin për aksidentin në komunikacion që ka ndodhur dje në aksin rrugor Rrëshen-Fushë Arrëz, ku humbën jetën disa qytetarë dhe u lënduan disa të tjerë.
Duke marrë pjesë në këtë dhembje, ju lutëm shkëlqesi, të pranoni ngushëllimet tona të sinqerta për Ju, për familjet që humbën familjarët dhe më të dashurit e tyre dhe për popullin e Republikës së Shqipërisë ndërsa të lënduarve ju urojmë shërim sa më të shpejt.
Republika e Kosovës, solidarizohet fuqishëm dhe bashkëndien dhembjen e Republikës së Shqipërisë për ngjarjen e hidhur që ndodhi dje në aksin rrugor Rrëshen-Fushë Arrëz”.

Kerkohet hulumtim profesional ne rashk te serbisë

bannqe — Sun, 18 Jul 2010 09:23:52 GMT

Autoritete kosovare dhe ato të EULEX-it së shpejti do t’i kërkojnë Serbisë të hulumtojnë në mënyrë më profesionale lokacionin në Rashkë të Serbisë ku dyshohet se ka varrezë masive.

Sipas zyrtarëve kosovarë së shpejti do të kontraktohet një kompani ndërkombëtare, e cila bën verifikimin e eshtrave në thellësi të tokës.

Komisioni qeveritar i Kosovës për persona të pagjetur dhe ekspertët mjekoligjorë të EULEX-it janë të pakënaqur me mënyrën se si po bëhet hulumtimi i lokacionit të dyshuar për varrezë masive në Rashkë.

Metoda me të cilën po bëhen inspektimi i vendit të dyshuar sipas autoriteteve kosovare dhe atyre të EULEX-it nuk është duke u bërë në mënyrë adekuate.

Arsim Gërxhaliu anëtar i komisionit kosovar për persona të pagjetur tha se nuk do të hiqet dorë deri në gjetjen e eshtrave." Mënyra se si po hulumtohet varreza nuk është profesionale. Ne së shpejti do t’i dërgojmë autoriteteve serbe një kërkesë që kjo të bëhet me metoda më të avancuara. Nuk do të heqim dorë nga kërkimi i mëtejmë i eshtrave”, tha ai.

Zyrtarë të EULEX-it gjithashtu i thanë Radio Kosovës se një raport rreth mënyrës së hetimit të varrezës do t’i dërgohet së shpejti komisionit qeveritar për persona të zhdukur të Serbisë dhe Kosovës.

Dy muaj më parë prokuroria për krime lufte e Serbisë ka filluar hulumtimin e një varreze masive në vendin e quajtur Rudnicë në rajonin e Rashkës, ku dyshohet të janë varrosur trupat e 250 shqiptarëve të vrarë gjatë luftës.

Autoritete kosovare dhe të EULEX-it sipas Gërxhaliut së shpejti do të bëjnë kontraktimin e një kompanie të huaj që verifikimn e eshtrave në thellësi të tokës.

" Qeveria e Kosovës do të bëjë kontraktimin një kompanie të huaj enkas për lokacionet e dyshuara në Serbi me anë të së cilës do të bëhet shikimi i prezencës kockore në thellësi të tokës”, tha ai.

Ndërkaq përveç Rudincës janë edhe tri lokacionet të tjera të dyshuara ku po hulumtohet mundësia e ekzistimit të varrezave masive: në Topallë afër Medvexhës, një rajon tjetër në Rashkë dhe në një lokacion afër liqenit të Peruqacit./rtk/prishtinaWEB

Në Partesh sot balotazhi për kreun e komunës

bannqe — Sun, 18 Jul 2010 09:20:06 GMT

Partesh, 18 korrik – Sot, në Partesh mbahet rrethi i dytë i zgjedhjeve – balotazhi, pasi raundi i parë nuk kishte nxjerr fitues për kryetar të Komunës së Parteshit, e themeluar në bazë të Planit të Ahtisaarit mbi decentralizimin.

Përgjegjësi i Komisionit Komunal Zgjedhor, Zoran Stojanoviq, ka thënë të shtunën se çdo gjë është gati për zgjedhjet e së dielës, listat zgjedhore me emrat e votuesve janë gati dhe presim mbarëvajtje të procesit zgjedhor. Ai ka thënë se zgjedhjet e rrethit të dytë në Partesh për kryetar komune do t`i monitorojnë përfaqësues të Ambasadës së SHBA-së, Britanisë së Madhe, Zvicrës…, ndërsa vetëm Ambasda e Amerikës me 29 vëzhgues. Ndërsa në KQZ kanë thënë se janë akreduar vëzhgues nga një ambasadë dhe nga dy OJQ vendëse, që gjithsejt janë akredituar 45 vëzhgues.
Në zgjedhjet e balotazhit garojnë Nenad Cvetkoviq dhe Todor Mirkoviq. Në raundin e parë të zgjedhjeve, nga 4 kandidatë, Cvetkoviq nga Iniciativa Qytetare „Zaviçaj" kishte fituar 47.68 për qind të votave, ndërsa Mirkoviq nga Iniciativa e Listës së Bashkuar Serbe (JSL) kishte fituar 25.46 për qind të votave.
Sojanoviq i KKZ-së ka thënë se në 3 qendra votimi dhe në 5 vendvotime, që do të jenë të hapura në orën 7:00 – 19:00, kanë të drejtë vote 3.508 votues në Partesh, Pasjan dhe Budrikë.

Rëndohet gjendja e 9 vjecarit Erison Perja

bannqe — Sun, 18 Jul 2010 09:18:13 GMT

Rëndohet edhe më shumë gjendja shëndetësore e 9 vjecarit të aksidentuar dje në Fushë Arrëz, Erison Perja.
Vogëlushi ka marrë plagë të renda në mushkëri cka po ndikon në rëndimin e gjendjes së tij shëndetësore. Transportimi i tij për në Senatorium është i pamundur, prandaj pritet mbërritja e aparaturës së frymëmarrjes në Spitalin Ushtarak.

Ndërkohë, sot do zhvillohet ceremonia motrore e tre anëtarëve të familjes Mustafa, Arben, Lavdie e Merlinda Mustafa. Kjo familje është edhe më e prekura në aksident, pasi dy anëtarë të tjerë Armando e Dona Mustafa janë shtruar në spital. Drejt Pukës janë nisur edhe 4 deputetë socialistë, të cilët do ngushëllojnë familje e viktimave.

Spitali Ushtarak, dy fëmijë në gjendje të rëndë

bannqe — Sun, 18 Jul 2010 07:10:48 GMT

Shefi i Reanimacionit në Spitalin Ushtarak, Petrit Zhurda ka deklaruar mëngjesin e sotëm se dy fëmijë të plagosur në aksident, janë në gjendje të rëndë shëndetësore.

Sipas tij, më kritike paraqitet gjendja e njërit prej fëmijëve, i cili ka pësuar dëmtime të rënda në mushkëri.

Në vijim të fjalës, mjeku i Spitalit Ushtarak ku janë shtruar të plagosurit e aksidentit tragjik, u ka bërë apel qytetarëve të dhurojnë gjak për t’u ardhur në ndihmë personave që janë plagosur.

Aksidenti, 18 korriku shpallet ditë zije

bannqe — Sun, 18 Jul 2010 07:08:00 GMT

Qeveria ka shpallur ditë zije 18 korrikun, për shkak të aksidentit rrugor të ndodhur në Pukë, që u mori jetën 14 personave.

Lajmin e ka bërë të ditur zëdhënësja e qeverisë, Erla Mëhilli në një konferencë për shtyp.

"Qeveria ka shpallur 18 korrikun ditë zije për viktimat e aksidentit dhe do të mbulojë të gjitha shpenzimet për varrimin e tyre”, ka pohuar Mëhilli.

Ndërkohë, reagime kanë ardhur edhe nga radhët e LSI-së. "Jemi pranë familjeve të viktimave. Të bëhet e pamundura për të shpëtuar të plagosurit”, ka deklaruar sekretari i përgjithshëm Luan Rama.

Aksidenti, shkon në 14 numri i viktimave

bannqe — Sun, 18 Jul 2010 07:04:41 GMT

Janë 14 personat që kanë humbur jetën në aksidentin tragjik të ndodhur pasditen e sotme në aksin rrugor Rrëshen-Fushë Arrëz.

Lajmin e bëjnë të ditur burime policore zyrtare, sipas të cilave disa prej viktimave humbën jetën gjatë transportit për në Spitalin Ushtarak në Tiranë.

Sipas burimeve, janë identifikuar edhe shumica e viktimave që janë: Mimoza Hasani, Arben Marku, Alma Marku, Albiona Marku, Marie Prenga, Paulin Gjoni, Fran Paloka, Gjovalin Peraj dhe Zef Gjini, që ka qenë dhe shoferi i autobusit.

Ndërkohë, drejtori i përgjithshëm i Policisë së Shtetit, Hyseni Burgaj ka deklaruar se Gjini ka qenë një shofer me përvojë.

Pjesa më e madhe e viktimave, mes të cilave ka shumë fëmijë, ndodhen në qendrën shëndetësore të Gjegjanit dhe banonin në Pukë.